Galicia é unha das máis importantes potencias forestais de Europa xa que conta cunha superficie total arborada de máis de 1.400.000 hectáreas, o que representa o 48% de todo o territorio.

As actividades que conforman a Cadea da Madeira constitúen un dos principais sectores da economía galega, con arredor de 18.000 postos de traballo directos.

Galicia é o principal territorio produtor de madeira en España xa que produce aproximadamente o 40% do volume total español de madeira serrada, así como o 60% dos taboleiros derivados de madeira, mentres que consume aproximadamente o 20% do total estatal.

Segundo cifras do III Inventario Forestal de España, actualmente hai en Galicia preto de 1,5 Mha. de superficie arborada, cun volume de corta de madeira industrial de aproximadamente 7 Mm³/ano, ademais de 1,5 Mm³/ano de leña o que en conxunto supón algo máis do 50% da madeira que se corta anualmente en España.

O volume total de madeira consumida pola 1ª transformación galega sitúase en torno aos 6,5 Mm³/ano, sendo os aproveitamentos principais o de trituración para pasta e taboleiro, destinándose á mesma aproximadamente dous terzos da produción, e o de aserrado. Obsérvase así que os procesos industriais máis importantes en Galicia son a produción de pasta e a industria dos taboleiros con preto de 1.000 millóns € de facturación.

A 2ª transformación galega da madeira factura en torno aos 700 millóns €. Galicia erixiuse nos últimos anos como referente dentro de España no segmento do mobiliario de cociñas ademais de presentar moito dinamismo na fabricación de portas.

Os principais mercados exteriores do sector da madeira e moble en Galicia son Portugal, Francia, Países Baixos, EEUU e México.