O sector de servizos especializados a empresas que aquí se considera engloba todo tipo de actividades de servizos prestados a empresas, agás as profesionais, técnicas e tecnolóxicas. Inclúe así, por exemplo, as actividades industriais de limpeza, de seguridade e vixianza ou o aluguer de maquinaria e de equipo sen operario.

Estas actividades, xunto cos servizos profesionais, técnicos e tecnolóxicos, constitúen no seu conxunto un dos sectores de máis peso na economía galega, concentrando máis de 83.000 ocupados e arredor de 26.500 empresas.

Nos últimos anos foi o sector galego que, xunto coa construción, máis emprego creou, cun aumento entre 2000 e 2006 superior ao +50%.
Polo que se refire ao número de empresas, este aumentou no mesmo periodo en máis do +45%.

Son actividades que están asumindo un protagonismo esencial tanto en Galicia como nas demais economías desenvolvidas, multiplicando as fontes potenciais de eficiencia, especialización, flexibilidade e de melloras organizativas para as empresas coas que traballan.