A actividade da construción é un dos sectores económicos relevantes da economía de Galicia, cun peso do 13% no PIB e na ocupación, e cun importante efecto de arrastre sobre outras ramas da actividade económica.

Trátase dun sector xerador de emprego, que mostrou nos últimos anos un ritmo de crecemento e de creación de postos de traballo por enriba do conxunto da economía. Na actualidade, ocupa arredor de 135.000 persoas, e conta con maís de 28.000 empresas na Comunidade.

Unha das características que conforman a estrutura do sector é o gran número de axentes que interveñen nel, tanto polo lado da oferta como polo da demanda. Mentres que no caso da obra civil a demanda é realizada fundamentalmente polo sector público, na edificación interveñen como demandantes un gran número de empresas e particulares.

Os diferentes subsectores que conforman este complexo produtivo están realizando na actualidade importantes esforzos na continua mellora da calidade e na innovación, para o cal están están profundizando na cooperación e na súa estruturación interna.