Economía e Industria e Invest in Spain promoven unha xornada práctica sobre as fontes de financiamento para apoiar proxectos de investimento
Os asistentes recibirán un exemplar do “Atlas de fontes de financiamento”, que inclúe recomendacións sobre a negociación coas entidades financeiras e a xestión de axudas públicas
Co obxectivo de dar a coñecer ás principais fontes de recursos públicos ou privados que poden ser de utilidade para o financiamento de investimentos empresariais en Galicia, o Igape e a sociedade estatal Invest in Spain organizan unha xornada informativa de carácter práctico dirixida a directivos e xerentes de empresas que se desenvolverá hoxe no Club Financiero de Vigo.
O Igape, dependente da Consellería de Economía e Industria, e a sociedade Invest in Spain, do Ministerio de Industria, Turismo y Comercio, teñen entre os seus obxectivos comúns a atracción, desenvolvemento e mantemento de investimentos empresariais na comunidade autónoma de Galicia. Asumindo que a compoñente do financiamento é un factor clave para a viabilidade de calquera proxecto de investimento, ambas entidades colaboran para facilitar a aproximación a un mellor coñecemento das fontes de financiamento, de particular interese para os promotores de operacións de investimento.
Na apertura da xornada intervirán o director xeral do Igape, Joaquín Varela de Limia, e o conselleiro delegado de Invest in Spain, Javier Sanz. A continuación, o profesor do Instituto de Estudios Bursátiles José Góngora presentará o atlas de fontes de financiamento. Durante o seu relatorio, deterase en aspectos referidos ás características xerais dos tipos de fontes de financiamento, a casuística e restrición das fontes de financiamento, os aspectos esenciais para seleccionar unha fonte, como negociar coas entidades financeiras ou como xestionar as axudas públicas.
No apartado dedicado ao financiamento autonómico, o director de Promoción Empresarial do Igape, Casto Varela Gesto, explicará o variado abano de axudas financeiras e servizos que achega a Xunta de Galicia, en particular a través do Instituto, para facilitar o desenvolvemento de novos investimentos ou a ampliación e consolidación de iniciativas empresariais xa asentadas no territorio de Galicia. A xornada rematará coa exposición dun caso práctico.
